「欖球」決戰藍軍唔掂

港陌

14/05/2011
文： 力奇

超級星期六曼市狂熱！曼市雙雄天生宿敵，曼城本來以為有機會喺足總盃封王搶風頭，點知英足總為遷就歐聯決賽安排溫布萊養草兩星期，將FA Cup提前喺周六舉行，同紅魔「登基」場英超撞到應。究竟最終係曼聯迷先飲頭啖湯狂歡，定係曼城迷「後發先至」做贏家？呢場「紅藍另類打吡」好睇過戲！




英格蘭足總盃決賽今晚上演「雙城故事」，曼城喺溫布萊同史篤城爭冠軍。咪以為「藍軍」財雄勢大名氣夠，就一定贏波，要知道打法硬淨嘅「欖球隊」史篤城近期Fit爆，連續5場不敗連兵工廠都衰喺佢哋手，曼城90分鐘未必贏得到，今場捧2倍「讓球客勝」！（now671台及廣東體育周六晚10:00直播）


曼城泰維斯上陣今晨定奪


力爭35年來首冠嘅曼城，爭勝決心當然毋庸置疑，特別係班主文梳亞自08年入主球隊後，先後使咗超過3億鎊增兵，依家梗想有回報啦！佢哋講人腳肯定喺史篤城之上，但講到打決賽，力奇始終對佢哋有多少懷疑，之前歐霸盃16強連基輔戴拿模都過唔到，再睇埋今屆聯賽盃決賽，阿仙奴都輸得畀伯明翰，所以話強隊唔一定贏梗o架！




再者，曼城前線最有入球能力嘅前鋒泰維斯，之前因為大腿受傷抖咗成個月，到上場聯賽先復出踢唔夠10分鐘，領隊文仙尼話明今朝做完檢查先決定畀唔畀佢打正選，顯然狀態有限，又幫得到幾多？一旦「野獸」唔踢得，文帥惟有喺巴洛迪利同腳風麻麻嘅迪斯高之間二揀一。睇番曼城近5場入6球，1球係人哋烏龍波，4球係靠防中，只得1球係由迪斯高入，前線火力真係信唔過o架！


史篤城近況弗到爆


貴為英格蘭史上第2歷史悠久球會嘅史篤城，創會148年以來，只曾經喺1972年贏過個聯賽盃，今次都只係首次殺入足總盃決賽。難得有機會捧盃，球員肯定搏命，最緊要係呢班波一向波到腳到人見人怕，兵工廠領隊雲格更加封佢哋做「欖球隊」。論狀態佢哋近5戰有3勝2和好Fit，贏過阿仙奴3:1，足總盃準決賽炒保頓5粒，賽前仲有消息話後防重心賀夫同中場艾法寧頓都趕及傷愈，齊腳出擊，或者可以創造奇迹。


兩軍晉級之路


曼城

第3圈‧客和李斯特城2:2

第3圈重賽‧主勝李斯特城4:2

第4圈‧客和諾士郡1:1

第4圈重賽‧主勝諾士郡5:0

第5圈‧主勝阿士東維拉3:0

8強‧主勝雷丁1:0

4強‧中立場勝曼聯1:0

史篤城

第3圈‧主和卡迪夫城1:1

第3圈重賽‧客和卡迪夫城0:0，加時勝2:0

第4圈‧客勝狼隊1:0

第5圈‧主勝白禮頓3:0

8強‧主勝韋斯咸2:1

4強‧中立場勝保頓5:0

近5屆決賽

09-10 車路士 1:0 樸茨茅夫

08-09 車路士 2:1 愛華頓

07-08 卡迪夫城 0:1 樸茨茅夫

06-07 車路士 0:0 曼聯（加時車贏1:0捧盃）

05-06 利物浦 3:3 韋斯咸（加時3:3，12碼利贏3:1捧盃）

曼城對賽冇着數

‧歷來第9次入盃賽決賽，對上一次捧盃為1976年。

‧近4次交手均與史篤城打成1:1。

史篤城近9戰僅1敗

‧歷來首次殺入足總盃決賽，球會史上僅在72年贏聯賽盃。

‧近9戰1敗，曾贏阿仙奴及和車仔。