棟悉先機：仔仔女女 超級頭馬

猪拉多纳

　　今日賽事以7草3泥形式進行，7場草地採用C+3欄，有睇開阿棟嘅專欄，都知我會點講，尤其呢幾日天陰陰，落雨濕濕，如果撞正跑緊馬先至有雨，幾難唔爆。但最慘係唔知會爆成點，唯一可以做嘅係克己，呢類場合忍忍手，小注怡情，不要浪費彈藥。

　　第二場四班1200米泥地。「仔仔女女」剛賽回到此程再作嘗試，即以超班姿態打開勝利之門，造出快時間已知厲害，同時，被牠擊敗的，翌仗紛紛有佳績，如該役第二名「哈哈妙」，接戰可成功補中，跑第三名的「金獅駿將」，再出名次也升1級，大概已知「仔仔女女」在四班同程絕對有壓倒性優勢。今場續用何澤堯，人馬有晒默契，除非加6分構成阻力，要不然，連捷機高。

　　第五場四班1600米草地。「利駿」對上3場1400米，成績反反覆覆，主因係演繹手法問題，唔係嘥口水想講番轉頭，前仗走去擺前走，的確係唔多對路！上場肯留前鬥後，咪即刻上番名。我假設佢今場仍然會留住跑，以近仗在1400米末段追勢，加程200米不應有反效果，未交代之馬，柏寶唔放手，冇理由留以有待。

　　第六場四班1400米草地。「自由萬歲」上場險勝而回，只因對手真係唔易應付，二馬「勁贏晒」，將來至少在三班冇阻力，所以，「自由萬歲」僅勝係好正常！隻馬加6分，我唔會擔心，係驚131磅影響有幾大，如果負重能力不太差， 憑1檔之利，唔係冇得再贏。

點買法

　　由於草地賽用C+3欄， 冇心水真係唔建議亂咁買，玩一兩場夠數吧！今日買QT，我揀第二場算嘞。買W 就捧「仔仔女女」場，硬要搵多隻嚟射，「自由萬歲」比較合心水。


陳華棟