英超星期天仲有火…

猪拉多纳

15/05/2011
文： 樂比堅尼

英超嚟到倒數第二輪，雖然曼聯已經奪冠，但關乎使唔使踢歐聯附加賽嘅聯賽三、四名之爭、第五名嘅歐霸盃資格同護級形勢都仲有懸念，無論站喺觀賞抑或菠菜角度，周日嘅英超依然「火氣十足」，樂比仔喺度一場不漏，為你作全面推介。


撐車仔主場打鵲謝幕


今晚英超頭場車路士主場對紐卡素，呢場波表面上無關痛癢，但車路士失落聯賽冠軍後，唯一可以做嘅就係喺餘下兩場賽事贏得好好睇睇，順便攞埋個聯賽亞軍，然後向班主阿布拉莫域謝罪，反觀紐卡素無欲無求，無論領隊柏杜同球員都抱住提早放假嘅心態，因此樂比仔支持「讓球主勝」，進取啲可捧埋「主其他」波膽！（有線201及301台周日晚8時30分直播）




車路士今季衞冕失敗可謂非常合理，不過樂比仔講句公道說話，季尾嘅車仔表現確實有起色，並冇因「四大皆空」嘅事實或大清洗嘅傳言而影響表現，畢竟車仔大部分球員都係有經驗而且專業，絕唔會因為冇得爭標而揸流攤，所以樂比仔對車路士今仗抱極大期望，好似抖咗大半季嘅林柏特、仲未證明自己身價嘅「王子」托利斯，都要喺餘下兩場展示自己嘅實力！




車仔近年喺季尾都有鋪大炒癮，好似上季嘅最後兩場主場聯賽就分別以七比○大勝史篤城，同埋八比○大勝韋根，前一季冇咁癲，但最後四仗聯賽主場都入咗十二球，有理由相信今場一樣會大手交易。值得一提係今晚車仔會穿着全新波衫喺主場謝幕，車迷要留意嘞！


紐卡素作客唔掂


「喜鵲」今季主要靠三個人，一個係已轉投利物浦嘅安祖卡路爾，另一個係隊長兼首席射手路蘭，而最後一個係被譽為今季英超最佳收購嘅防守中場迪奧迪，但今仗三人都不在陣，隊長路蘭因傷施手術已提早收咧，而迪奧迪則因為攞咗十四張黃牌，再攞多一面就要坐跨季波監，既然紐卡素有條件踢風流波，咁就不如收起埋佢。




紐卡素最近三場聯賽作客輸晒且一球不入，無心戀戰加上陣容不整，有機會畀車仔大炒，捧車仔「讓球勝」同「大」之餘，「主其他」波膽亦可一試！