高清睇跑馬：快樂無窮三連捷

魑魅魍魉

　　第五場四班1200米，「快樂無窮」質素根本唔差，只係病過長期偏瘦，才遲遲先有表現，搞好健康進度，搵到田草1200米最佳路程後，大前仗總場次 518終於首次上名，僅不敵佔盡步速優勢的「明海光輝」得第二。其後牠再戰同程總場次572立即補中，該役牠繼續採用留前鬥後跑法，全程走三、四叠照贏。上仗總場次601由卓利易配蔡明紹，早段留到包尾落後極多，難得極之輸蝕下一樣照贏，仲要贏夠個幾馬位，怪不得評磅員高度重視，賽後加佢九分。打叠贏馬後，今仗仍戰四班極具優勢，加上馬房繼續搶攻戰意好，放心追捧。

豐衣足食A欄啱衝

　　第九場三班1400米，「豐衣足食」上季兩W同樣配本地騎師，同樣靠後追，技驚四座。可惜之後健康唔妥，二月中已提早唞暑，上年十月尾重返前線，首兩仗表現不差，其後六戰更取四亞一季，總場次326落第只因心律不正而已。睇此駒對上三仗次次亞軍，全部影相飲恨極之唔抵，加上每次都排外檔起步，轉彎蝕晒位，敗不足據。

　　牠上仗於總場次577僅輸馬頸，是近三戰中輸得最遠一次，但要留意該役步速不算快，兼且冠季軍「風雲武士」、「魔幻大師」佔盡步速之利，「豐衣足食」能於劣勢下追入亞軍，更締出1.22.52，是轉戰1400米後最快一次，可見該戰水準之高。此駒本身不斷進步，今次飛起湯智傑改配潘頓決心盡現，田草A欄長直路又啱佢衝，在眾多有利條件之下，有力坐正。

Sam