洪禮賢講馬：快樂無窮軒轅勇將良辰美景紅珊瑚 豐衣足食羅馬奔騰龍城動力馬風雲

港陌

　　今日唔係大賽日，但一樣跑A欄，睇過隔夜賠率，唔少熱到透晒嘅馬，似乎幾穩陣，估計呢期唔少場合都應該唔會點爆得出樣。

重心場次　第9場　第三班（80-60分）1400米

　　「豐衣足食」連場做阿二，硬係追唔切，運氣成分佔大多數。今仗因多馬喺前中段會走埋一份，營造到有利後追環境畀佢，希望直路可衝贏晒。

　　「羅馬奔騰」上賽前指出操練進展好，落場跑亦交得到貨，唔係直路衝得唔順應有P，如確認跑得番，三班堅挺。「龍城動力」及「進勝福星」，一對馬必採主動，早段快成點？好睇兩駒如何互動，如非過分快放，前駒仍有P望。

　　「馬風雲」分數冇上升空間，只因負磅輕，令競爭力略增。「化工之昇」喺三班要賺晒形勢才有威脅。

第1場　第四班（60-40分）1000米

　　「健康精英」兩勝大閘速度感一流，雖然只係800米閘，冇1000米大閘咁有根據，但見進度在3個多月操磨後，愈來愈實淨。

　　「黃金年代」比較最近3大閘表現，喺5月頭嗰次，操控、自動性及姿態俱見改進，嚟到埋門起得幾好。「父子兵」2、3月工夫冇乜，進度點都受影響，跑質。「金巴利來」和「好歌」，遇到班內質新馬唔易啃，係跑路程經驗。

第2場　第五班（40-10分）1800米

　　「綠駿群英」回到田草長直路，唔會再受檔位及短直路因素掣肘，後勁可盡情發揮。「呼風喚雨」落班後對手與前有別，就算狀態唔夠sharp，依然有得爭。

　　「大衛金剛」加程未必係好事，除非早段唔快畀佢賺晒。「神箭金剛」季尾有動作，未贏前唔會收手。「森林活泉」視乎步速及沿路發揮，如有交出勝時水平，當然話贏就贏。

第3場　第二班（100-80分）2000米

　　「包裝選擇」3W在手，剛勝兩匹對手，排住隊贏，而佢贏馬後只加7分，仍有很大上升空間。「開心老友」愈贏愈輕鬆，但上場係大爛地賽績，升班再戰未必冇阻力。

　　「滿綵」上場肯留仍後追不及，但證明前仗真係跑錯晒，至於跑長400米如何？睇佢上賽拉士表現，或會有助。「較量」馬少步速唔快，會繼續賺。「怡勝」二班往績強（兩場贏晒），但後追跑法在今場未必好跑。

第4場　第四班（60-40分）1400米

　　「氣定神閒」剛仗泥地當試大閘就算，肯回草地中程，分利馬點都追多場。「搖滾雄豐」排好位跑1400米，預期形勢似入Q一役，要拖。

　　「新三刀王」冇板斧，擺前走靠步步檻，睇吓放到邊度，最多爭三至五名。「陽光王子」剛賽除配件，早段冇預期咁落後，而末段曾被困仍有唔錯追勁，但性能應以1600米係起碼路程，係擔心後上不及。「朝東之星」回升四班即被打窒，但直路塞車係主因，畀多次機會。「傑出君子」前仗有痰，上場仍然冇走勢，難再跟進。

第5場　第四班（60-40分）1200米

　　「快樂無窮」喺冇可能有位置嘅情況下，連續兩場靠一條直路掃低對手，後勁「恐怖」，惟今場要睇吓加10磅對佢有幾大影響。「軒轅勇將」做嘢做到出晒面，縮回此程更好放。

　　「雙辣」唔叻，要睇對手演出好壞才有機會。「良辰美景」初出撼得「添福駿驥」，四班唔會冇馬贏。「紅珊瑚」14檔唔會好跑，不過，上場都係沿路三叠仍有Q。「駟馬難追」流鼻血後初出，宜觀望。

第6場　第三班（80-60分）1200米

　　「紅旗勇將」第2仗贏番，證明首戰好大程度係場地拖累。而睇佢上場取位，田草應更好。「堅旺財」剛賽已揀，因前仗谷草1200米已顯出場地和路程性能。

　　「正白旗」啱啱輸，係因為頭罩？定係直路賽？宜睇多場。「沙紙」同場對手級數明顯不如前，憑速度已夠爭。「飛快威」加程方是正確，一日未行呢步，最多只會跑得接近。

第7場　第一班（120-100分）1600米

　　「金獅威將」和「勝眼光」，1600米級數比此場對手高，負磅重，依然讓得起，如早段唔快則後駒會好跑。

　　「共創未來」及「讚惑」，路程性能方面，後駒秤先。「卡達聖」縮程多少有障礙，不過，前仗贏同程好有水準。「藍天」唔使負重，其實喺今場夠卡士有凸。

第8場　第三班（80-60分）1600米

　　「高一線」畀柏寶跑，會得到適當發揮，但要寄望馬少，早段唔好慢鬥慢。「名人」主動跑法喺呢場好啱夾。

　　「一路順風」若遇到慢步速，一如前駒賺晒。「千江映月」過去匆出嘅表現略失色。「太平星」唔放頭，即喺上場跑番好，希望今場留放咪亂嚟。

第10場　第二班（100-80分）1600米

　　「戶外名駒」二班地位高晒，視乎場地狀況如何，跑正常場地，唔會怕任何對手。「續領風騷」此類摩廐早有表現嘅PP，通常會繼續「澎澎聲」。

　　「勁高手」及「四季」，跑法相近，惟前駒賽績予人信心較大。「火箭動力」及「易搏贏」轉場後唔易再跑得好。「邦先生」近績穩定，亦試好跑法，有埋2檔會幫到幾多。

馬會賽馬節目主持　洪禮賢