伯明翰蒲兵怕熱捱細界

猪拉多纳

22/05/2011
文： Tami

英超今晚煞科，有線同一時間送上十場英超，仲要有五場同時係高清直播，破盡本地電視台紀錄！我相信今晚有線大樓一定好似世界盃時咁熱鬧，因為全個七樓體育平台同事都要總動員開工。英超下游形勢混亂，當中五支球隊都有降班危機，應屆英聯盃盟主伯明翰正好係其中一隊，佢哋今晚作客熱刺，對手都要爭勝力保歐霸參賽資格。以近況同實力計，小妹睇好熱刺主勝同入球細。（有線61台周日晚11時直播）


熱刺仲要爭歐霸


早幾日伯明翰領隊麥利殊先畀班球員激死，呢排護級重要關頭，球員竟然照樣出去蒲到凌晨四點，麥利殊唔拍枱就勢係假。自從伯明翰贏咗英聯盃冠軍後，班球員好似當自己放大假咁，踢到冇晒火，成績一落千丈，近十一場聯賽輸六場，差唔多係開季至英聯盃決賽前嘅總和！近三場英超，伯明翰埋門中龍次數只有三次，當然施積受傷對球隊攻力大受打擊，令謝路美發揮亦受影響，加埋左閘史葛丹恩受傷，都係球隊成績下滑嘅致命傷。




雖然我唔鍾意熱刺領隊夏利列納，不過以球員表現計，今晚主場贏應該難唔倒熱刺。佢哋早前已經有加里夫巴利收咧，連同中後場咁多傷兵，中場大腦莫迪歷都係踢到滿場飛，而中堅京治復出拍住戴臣同樣出色，加上仲要爭下屆歐霸入場券，小勝應該冇問題。




熱刺Vs伯明翰　主勝