借題發揮：谷賽剛破悶局 今期有馬在手 文廐戰駒食住上

港陌

　　文家良今季在快活谷成績保持得唔錯，「文武維揚」攞埋百萬挑戰盃冠軍，更加係錦上添花。至此呢個馬房在谷草交出18冠15亞13季，上名率逾3成，而單計谷草頭馬總數，緊隨方葉兩廐，排在第三位，經已顯示出文廐在此場地的搏殺心態。

　　之不過，根據近月文廐在谷草的表現，原來有一段「真空」期，在16/3贏完「風雲勇子」之後，有兩個月未在谷中發市，要到上周三的一對「歐洲」系，先至同呢個馬房破悶局。

　　既然有回起現象，今期文廐亦有馬在手，怕且乘勝追擊係必然之事。席上揀珍，7匹上陣馬中，不少排在好檔，在C欄有好位之助，其實已是成功的第一步，所以，鍾意嘅馬當然有排內檔嘅文廐馬。

御將軍旅英駿駒檔利

　　「御將軍」及「旅英駿駒」俱跑1200米，分別排了1、2檔，的確有爭勝先決條件之一，而如果前駒今晚遇上濕地，威力將會大大增強！後駒近仗表現普通係事實，要知道是場對手遠比近仗失色，有謂跑馬跑對手，賺級數可能夠贏。此外，「鑽飾彩虹」之前用杜利萊表現十分醒神，忽然回配最佳拍檔，點會冇企圖。

Jack