波場大亨：山度士福地煲魚生粥

港陌

25/05/2011
文： 亨格比利

南美自由盃4強聽朝開戰，打頭陣由巴甲勁旅山度士主場恭候巴拉圭球隊波特諾。作為巴甲唯一「生還者」，山度士當然要省靚森巴足球個招牌，加上今戰安排喺彭甘保球場呢笪福地舉行，贏波照計冇問題，博山度士小勝，捧3.35倍「讓球和」。（有線61周四早上8:50直播）




山度士個主場係維拉貝爾米羅，但由於個場坐得萬五人，會方於是由第3場分組賽開始轉用彭甘保球場，呢場波佢哋大數塔奇拉3:1，去到8強亦同卡達斯打成1:1獲得4強席位，球會上下都認為呢笪係福地，加上彭甘保球場可容納超過3萬人，龐大球迷力量絕對係爭勝關鍵。


波特諾愛龜縮未必大敗


呢支聖保羅球隊上場巴甲同國體會各一言和，呢場波教練拉馬奴收起咗艾蘭奴、尼馬同隊長伊度達辛拿，擺明留力同波特諾搏命。牌面同人腳無疑係山度士勝一籌，但考慮到波特諾至愛玩龜縮，16強就試過兩回合都守和學生隊0:0，今鋪造訪實力更強嘅山度士肯定屯重兵喺後防，照計輸都唔會輸得太肉酸，「讓球和」有分頭博得過。