叱咤楓雲：地頭龍銀河冇碧咸照搶3分

港陌

25/05/2011
文： 朱楓

冇碧咸，So What？雖然洛杉磯銀河聽朝喺美職主場對侯斯頓戴拿模有碧咸缺陣，但班波勝在今季主場成績穩定，加上仲有當弗射手當路雲等主力孭飛，1.65倍主W仍然值得熱捧！（開賽時間：周四早上10:30）




洛杉磯銀河今季表現極之穩定，日前喺打吡戰作客更以1:0勇挫死敵美國芝華士，繼續高踞榜首。雖然銀河今場有「萬人迷」碧咸因為要返英格蘭，參加前曼聯隊友加利佬嘅告別賽而臨時缺陣，不過銀河仲有暫時以7球排射手榜「冧巴溫」嘅當路雲，以及哥倫比亞老牌前鋒安祖孭飛，加上今季主場獲3勝2和不敗佳績，相信今場就算有碧咸避戰，要攞晒3分都唔難。


侯斯頓作客未開齋


對家侯斯頓戴拿模日前主場出擊本來有機會全取3分，點知臨天光瀨尿，喺補時階段被紐約紅牛逼和2:2，累積4場不勝，都咪話唔打擊士氣。事實上，侯斯頓暫時排東岸第3已經算係咁，事關老牌射手程拜仁、卡倫卡爾同中場丹尼告魯斯3大主力都一直養傷，難怪今季作客仲未開齋，只得4和1負成績，聽朝作客美職「一哥」銀河，破到蛋已經有交代！