洪禮賢講馬：大熱合作馬少失拖 兩對騎練靠得住

魑魅魍魉

　　賽馬世界，冇咩係冇可能，不論喺咩環境之下，要「反」起上嚟，邊個都冇辦法阻止，就如馬王不敗神話破滅，騎師十連霸等等，所以，好多嘢「咬」到好實，到頭來要睇命運安排，唔到你就唔到你！但有時係你嘅嘢，點都會畀番你。

　　好似周中賽事，好少見過賽駒馬鞍滑移一樣贏到，「超晒班」真係馬如其名，當時所見，出閘後跑咗冇耐，黎海榮經已滑鞍，成個人要傾前就住。諗住入到直路隻馬挨出中檔後，或會「慢車」，可能飛埋出大外檔，點知可以帶到尾，簡直係奇聞。

　　講開「超晒班」，不得不提姚廐與黎海榮，計埋呢匹大熱門，佢哋季內嘅大熱門合作馬原本堅得，11匹冇隻甩。但好景不常，當晚跑完第6、7場，「精密紡」及「傳奇快車」相繼冇P，無敵數據終於爆煲。

　　嚟到季尾，呢類紀錄爆完又爆，又如上周日賽事，「羅馬奔騰」捧成大熱門，未開賽之前，文廐與柏寶季內13匹大熱門，成績為6W7P，冇1隻跌出前三名，偏偏就係「羅馬奔騰」跑到影都冇（賽後驗到氣管多痰）。「超晒班」及「羅馬奔騰」嘅結果各走極端，但拉勻計，上述兩pair騎練嘅大熱合作馬，仍係信心標誌。

馬會賽馬節目主持　洪禮賢