高清睇跑馬:家樂飛有分在手

猪拉多纳

　　告東尼作風明刀明槍，但其實手法並非次次一樣，至於今日第四場三班1000米，「延續美麗」及「勁闖駒」一同列陣，雖然後駒冇出王牌，但磅位着數得多之餘，對上五戰更得一勝四位，如前仗於谷草1000米得季軍，初跑三班即有好表現唔簡單，而且該戰放唔出仍入位更非等閒；上仗於總場次614回師田草直路賽，僅輸鼻位飲恨得第二，但頭馬「鷹之團」跑出今季同程第二快時間，可見「勁闖駒」雖敗猶榮，這次隨時是東廐主力。

　　「家樂飛」在外地十七戰只得兩冠三亞一季，來港初期亦未見有突破，但大前仗卻突然變身，初跑田草1600米及當日不利追的情況下，單憑一條直路後上取勝。接戰添食又係高難度之作，由1600米縮落1400米照贏，埋門鬥衝之下交出超強鬥心，而上述兩戰同樣負重磅可見厲害。上仗於總場次578續跑 1400米，追勢一樣咁勁，可惜頭馬「續領風騷」實力超班，力拼飲恨時也命也，但「家樂飛」已彈甩季軍「陽明深心」，並跑出1分21秒7的快時間，升逾百分指日可待；這次配上曾在外地騎過的安國倫，大可放心追捧。

Sam