洪都拉斯大賽前現真身

猪拉多纳

29/05/2011
文： Richard Welbing

六月初中北美地區就會舉行美洲金盃，有份參與嘅薩爾瓦多及洪都拉斯明早相約「拍跳」以催谷狀態。洪都拉斯早前曾經與亞洲球隊南韓及中國進行熱身賽，兩場都輸大大鑊，但呢班波臨近大賽就會展現真身，有力喺美國中立場擊敗薩爾瓦多，客Ｗ捧得過。（周一早上6時開賽）




洪都拉斯於三月曾約戰南韓及中國，先後以○比四及○比三落敗，失球數字認真嚇人。不過當時大部分歐洲頂級聯賽競爭激烈，球員根本唔會為熱身賽付出太多，慘敗賽果唔能夠反映出本身實力。如今要為金盃備戰，預計幾位孭飛球員包括熱刺柏拉西奧斯，以及韋根孖寶亨特利湯馬士與美羅費古羅亞，今場都會全力以赴，以爭取佳績迎接大型賽事。


薩爾瓦多往績處下風


薩爾瓦多向來都係中北美洲魚腩球隊，而近年無論喺金盃外圍賽、世盃外圍賽以至熱身賽，薩爾瓦多對住洪都拉斯都係輸多和少，賽績上完全處於下風。洪都拉斯經歷兩場慘敗之後，仍被操盤手列作熱門一方，可知薩爾瓦多級數有幾低。