京城三寶開齋吳定強上岸

猪拉多纳

今季幫師傅吳定強攞過四Ｗ嘅賴維銘，尋日同強哥贏得最重要嘅頭馬，喺第三場五班千六米賽事，賴仔騎隻「京城三寶」後發先至，終點前一步殺低「喜相逢」同「帝皇福星」，替呢匹馬開齋之餘，仲替強哥贏得季內第13Ｗ，畢業上岸。
       
賴仔發揮出色

其實今鋪賽前強哥想搵潘頓或者杜利萊兩外籍大師傅騎「京城三寶」，但係佢兩人一早卜咗坐騎，最終就由賴仔掛帥，而後者亦不負所託，咁啱得咁蹺呢場就係揮低潘頓及杜利萊坐騎，證明師徒同心，其利斷金。
       

賽後吳定強話「京城三寶」根本係一隻後上馬，所以佢唔明點解競賽小組上鋪問佢做乜唔擺前走，依家證明佢嘅判斷正確，今次即刻後上開齋，真係咩面子都贏晒。