借題發揮：坐騎執靚檔 韋達發功

港陌

　　由於今期係快活谷C+3欄賽事，排到好檔位之馬，已是成功的第一步，如果跑法係前置型，更會相得益彰。唔單只係跑法問題，好簡單嘅道理，季尾賽事，會有幾多馬匹體力係十足十？未算係水鬥水，但大家都唔會係十成水準，如果在前面帶領，唔係亂放之流，直路有幾多對手可以夠氣力去追人吖！？沙田賽事可能會多啲，快活谷則唔容易了。

　　韋達喺今次8場賽事，過半數坐騎排到好檔位，如葉廐3駒，「勝在分秒」4檔、「紅日」3檔、「萬里駒」1檔，仲有蔡廐「點可成金」1檔，可以稱得上，未跑已經贏咗一截先！

　　筆者鍾意一條線咁嘜實韋達嘅馬，所以，自覺佢騎葉廐3駒一定會一條心。「勝在分秒」落番四班即刻跑首本路程，呢匹馬今季跑極冇W又冇P，健康問題係成因之一，但另一方面，減分已凸咗，發燒後跑番1場，估計呢場會隨時有唔同晒表現。

萬里駒戴眼罩放到

　　至於「紅日」和「萬里駒」，前駒輸在後追跑法，好在第五場早段唔應該慢，唔算好蝕底，只要交得出上賽那股後勁，唔會冇機會衝贏對手。後駒今次好有運，抽到1檔，1200米亦比1000米出色，如加眼罩令匹馬精神更集中，一口氣放返終點，好正路啫。

Jack