洪禮賢講馬：南陽望族哈哈大少大將風範康莊大道 樂韻悠揚勝在分秒都靈一號當旺

港陌

　　睇過之前兩期谷草戰果，多數跑得好嘅馬，通常都係早早喺前面，或者霸住好位，後上贏嘅馬唔係冇，為數真係有限，今期C+3欄，依然唔易跳出呢個框框。

重心場次　第7場　第三班（80-60分）1200米

　　「夢仙」及「點石成金」，一對馬都關韋達事，係揀騎？推唔甩？唔重要，因為呢對質新馬初出皆跑得理想，尤其係後駒，跑唔到P，演出卻甚有可塑性，下季隨時喺一班見。

　　「至尊飛飛」試完大閘後一段長時間放慢咗工夫，內裏咩原因？唔多清楚，純粹喺大閘表現唔錯，而上場跑到冇影，全因陣中至少兩度畀對手擠壓，自知佢料子有限，但話晒喺前仗仲贏緊馬。「精靈勇駿」及「沙紙」，賺跑法及檔好。

　　「同心威駿」剛仗半放棄嘅發揮唔多啱心水，換人或有轉機。「最佳孖寶」剛仗埋尾冇P略失望。

第1場　第五班（40-0分）2200米

　　「天鷹」兩仗前指出42分係處於危險性分數，要郁手唔難，結果跑P而夾在一堆季內長期喺長途跑得好嘅馬之間，賽績堅挺。隔了兩場唔多啱路程賽事，呢場又返到大長途，用得柏寶仲似樣（騎練上季起，五班合作8次贏4W）。

　　「康樂名駒」唔鍾意上場縮喺內檔窒窒吓衝，而上季尾此程能勝「活威小子」，加程好惡。「好球」剛仗加程名次下滑，係班次及直路攞位論盡影響，落番五班會唔同晒。「年年如意」神經刀，但見上場跑法略可咬住步速，拉士仲識追吓，有驚喜。「金像太子」及「機緣滙聚」納於邊線。

第2場　第四班（60-40分）1650米

　　「南陽望族」退出過、唞過，但近幾個月做番好晒，亦因5月有兩個大閘，應足夠開氣程序，耐冇跑亦唔擔心跑一哩莫氣，而佢略超四班，喺今場有得爭。

　　「哈哈大少」上賽前見靚，係場地搞鬼？或是配搭？冇乜所謂，因為今場乜都轉晒，畀多次機會。「大將風範」有番內檔會係兩回事。「心路」及「康莊大道」，有能力、檔好又磅輕，可以拖埋。

第3場　第四班（60-40分）1000米

　　「樂韻悠揚」未乖係肯定，上場柏寶騎一樣喺尾段突然「樁一樁」，不過，本身速度好係有眼見，希望今場靠速度，早早埋欄，或可放返。「勝在分秒」四班此程係一線角色。

　　「都靈一號」早已認為目前唔使一定靠放，加脷帶跑，可能喺今場有唔同演繹手法。「新蝦王」剛仗斷得太快了。「中國好」剛仗大敗或因直路動作唔順，計級數係有得爭，惜12檔難應付。「當旺」如比上手步速控制好，縮程唔怕。

第4場　第四班（60-40分）1200米

　　「神勇將軍」排內檔未必要縮到好後，發揮冇上場咁綁手綁腳，效果或仲正。「金獅駿將」及「多多昇」四班略超，係狀態唔夠銳。

　　「歡欣星」及「飛天龍駒」仲後生，論實力則喺四班應付有餘，不過，後駒可能跑1400米較好，亦因前駒終換配搭，似樣嘞！「贏馬組合」及「期望」，以目前水準，係咪可一可再，稍有保留。

第5場　第三班（80-60分）1650米

　　「魔幻大師」上場贏唔奇，因轉場對手真係唔同，不過，放得快仍輕勝係犀利（前兩段快標準時間1秒），除非加8磅完全應付唔到，唔係必可再W。「紅跑車」只要安國倫末段處理手法比上手肉緊，嗰段後勁或爆得更勁。

　　「紅日」有快步速，會啱追。「進取」谷草有回氣位，1650會比1600米更啱。「魅力星」贏馬時間慢，純粹靠賺，但要尊重初跑即勝。「大喜象」以上場拉士勢頭，加程係正確方向。

第6場　第三班（80-60分）1200米

　　「萬里駒」1檔及路有專長，淨係呢兩瓣，以足夠抵銷重磅影響。「紅旗勇將」贏馬嗰場係話過就過，唯一唔同係今仗要負131磅！

　　「軍策令」係擔心形勢不利追，實情前仗同程末段追得好誇張。「團隊精神」及「一定快」，今仗檔位形勢以前駒較好。「聚有盈」110磅好使好用，可惜排10檔。

第8場　第三班（85-60分）1650米

　　「伽羅」向來係心頭好，上番一哩啱晒，邊可能唔做正選。「生生不息」步速唔快或會擺得更前，未必係壞事。

　　「靚到爆」工序稍有甩漏。「正黃旗」中程會比短途合適，弊在11檔。

　　「精彩生輝」重新開氣後回跑一哩，時間表夾啱。「寶貝王子」10檔係麻煩，如決心搶，未必冇轉機。

馬會賽馬節目主持　洪禮賢