賑災波日本搏魯命

港陌

01/06/2011
文： 蘇豪

日本經歷地震及海嘯災難後，今日將於麒麟盃與南美球隊秘魯交手，賽事於東北地區新潟舉行，日軍災後首次舉行大賽，主帥沙哲朗尼徵召逾十名外流球員，幾近派出最強人腳，大軍主場威力強，有力輕取對手，捧2.2倍嘅「讓球主勝」！ （周三晚6時20分開賽）


經過驚天地震及海嘯後，日本今次首度舉行國際賽，主帥沙哲朗尼召入強勁陣容，多位星級外流球員都有歸隊，包括內田篤人、長友佑都、長谷部誠、家長昭博、岡崎慎司及本田圭佑等，多蒙特球星香川真司傷愈不久落選，但人腳仍然十分完整，整體戰鬥力甚強。

最強人腳列陣

沙哲朗尼同時召入大阪飛腳新星宇佐美貴史，有望提升中前場活力。與此同時，受災地區球隊仙台維加泰亦有球員入選，中場關口訓充表明要為東北災民而戰，爭勝決心極強。自發生災難後，日本球圈中人非常團結，今次以主人家身份出戰麒麟盃，誓必搏盡爭盃。


另一邊廂秘魯未有徵召老牌前鋒比沙路及箭頭荷西古里路，唯一孭飛球星為史浩克04快翼法芬，此子踢足成季攰到爆，戰意成疑，加上現時隊中充斥不少經驗較淺的球員，級數麻麻，今仗輸波機會極高，考慮到日軍鬥志高昂，可捧「讓球主勝」。