甘素尼馬係豪門搶手貨

港陌

01/06/2011


山度士係球星搖籃，出產過嘅球星多不勝數，最著名嘅當然係「球王」比利，佢可以話係山度士嘅「生招牌」，近年較有名氣球員則係迪亞高同羅賓奴，而最近人氣急升嘅除咗年僅十九歲嘅巴西國腳尼馬，仲有新「10號仔」甘素，可惜後者受傷今仗好可能缺陣。




今年二十一歲嘅甘素，司職進攻中場，佢嘅搶手程度同尼馬不遑多讓，多間歐洲豪門包括AC米蘭、國際米蘭、里昂同曼城都有意搵佢過檔，甘素承認意大利球會係佢首選，仲話早前同國米教練李安納度聯繫過，睇嚟大有機會喺暑假同尼馬雙雙離隊。


中場有艾蘭奴孭飛


除「雙子星」外，山度士仲有唔少球迷熟悉嘅球員，好似巴塞隆拿借將基利臣，早前就喺巴甲開鑼戰入波，中場有曾効力曼城嘅巴西國腳艾蘭奴校炮，另外前曼聯中場及意大利小國腳保斯邦都係山度士主力，咁多球星壓陣，難怪山度士被捧為自由盃大熱。