叱吒楓雲：山度士抖夠飲得杯諾

港陌

01/06/2011
文： 朱楓

自由盃4強首回合領先1:0嘅山度士，聽朝次回合作客波特諾有權再贏！事關呢支巴甲勁旅今仗有一眾抖夠主力復出，相反波特諾近期受種族歧視言論困擾，平手盤朱楓捧硬山度士！（有線61及廣東體育周四早上8:50直播）


波特諾球員涉種族歧視


首回合波特諾作客輸0:1，今仗一定要贏波先出到線，弊在近8場未試過入多過1球，5場自由盃淘汰賽夾埋只入2球，根本冇條件搶攻。最慘係波特諾後防烏列斯治賽前仲喺Twitter用種族歧視字眼侮辱巴西球員，引起軒然大波，畀人狂插，士氣直插谷底。




對家山度士為備戰呢場大戰，尼馬（左圖右）、艾蘭奴等主力上場巴甲連後備都冇。其實山度士之前喺分組賽曾同波特諾一組，獲1勝1和，包括作客贏2:1，加埋4強首回合，今場已係第4次交手，熟路到咁，難怪教練拉馬曹對出線信心十足，已經諗緊贏自由盃後，年尾喺世冠盃挑戰「外星球隊」巴塞嘅情景，你話山度士仲唔係坐和望贏格？


自由盃及巴西盃賽制


採主客兩回合淘汰制，自由盃為4強次回合，巴西盃為決賽首回合，若總比數相同，作客入球較多一隊晉級，再和則於次回合後即射12碼決勝。