朴主永結婚幫南韓沖喜

魑魅魍魉

03/06/2011
文： 走肖

南韓假波案愈揭愈臭，南韓今晚喺熱身賽主場對塞爾維亞，睇嚟要贏波沖吓喜至得，何況南韓隊長朴主永公布咗今個月結婚，摩納哥降班佢又講明走人要搵班落，呢場在公在私，佢都有需要入波幫手開主W，塞爾維亞唔齊腳要唔過。（開賽時間：周五晚7:00）




亞洲盃失利後，南韓領隊趙廣來承受巨大壓力，所以上場對洪都拉斯佢都吩咐球員搏盡，結果開4:0波膽總算平息眾怒。點知呢幾日，南韓假波案搞到滿城風雨，為咗挽回韓國足球聲譽，今次有份歸隊嘅外流球員包括前鋒鄭祖國、中場寄誠庸、李青龍同具滋哲，應該會落力搶W省招牌。


塞爾維亞唔齊腳


至於邊個會最搏呢？梗係朴主永啦，佢公布咗今個月12號同大學師姐結婚，結婚相都影埋，而且透過經理人放風要轉會，唔踢得好好睇睇，點見人先？塞爾維亞方面，中鋒施積、射手彭迪歷、中場卡錫同中堅尼曼查維迪全部冇入選，淨係靠中場史坦高域、蘇蘭托錫、後衞蘇保迪同高拉洛夫撐場，未必惡得出樣。