洪禮賢講馬：安國倫騎掂佳同

港陌

　　第九場二班1200米。「明燈」、「富高勝」、「步步快」、「旺當家」，齊齊喺總場次588交過手，今仗彼此嘅排檔、負磅、配搭等等，好多嘢唔同晒，唔覺又會出現同一賽果，由於前兩駒俱不用孭太重磅，預期因內檔有權賺埋形勢，揀膽一對馬擸晒。

　　「明燈」近仗多數喺前幾名返嚟，上唔到名通常係陣上發揮唔好，或是賽事形勢唔就。計佢前仗132磅跑同程，輸唔到1個身位畀「步步快」，而鬥得贏「手風順」，已值二班夠贏水平。隔了1仗重返準到痺嘅1200米，歷來係得1場跑到冇獎金（嗰場騎者近乎無人駕駛騎法），因有好位，處境與前仗入Q唔會有大出入，至少有P。「富高勝」近兩仗短途，唔係外叠，就係畀對手又阻又擠，亦曾缺課，有晒藉口原諒。再睇遠啲佢嘅往績，同程曾孭133磅，輸唔係好多畀最近喺級際賽上名嘅「富貴金龍」，按理降班負磅不算重，應該有得爭。

　　第十場三班1400米。「佳同」之前性急難留，喺同程表現唔算突出，自從加眼罩及縮程，雖然落場跑偶有早段唔穩定，起碼末段爆得起。上場用安國倫，屈居第二，但見騎者前中段鎖得到坐騎冇亂擺，而直路騎到有「扯」隻馬返終點之感，睇落人馬幾夾；除配件跑此程，安排合理，如果早段匿到好，唔係留到頂晒口，喺1400米料有更好發揮。