紅牛發火撞散機員

港陌

04/06/2011
文： 阿當K神

近期大跌Watt嘅紐約紅牛，聽朝會喺美職主場出擊，希望憑住前法國國腳亨利嘅射術，可以喺頹勢未止兼中門大開嘅哥倫布機員身上全取3分反彈。（開賽時間：周日早上7:30）


亨利腳風唔曳


早前一度3連勝嘅紅牛，近期突陷低潮，連續5場聯賽贏唔到不特止，近3場仲要喺落後之下驚險逼和對手。唯一值得慶賀嘅係，班波火力仍然Keep得住，近8場就攞到16球「士哥」，平均每場入2球，當中亨利就包辦咗6球，腳風叫做唔差，相信要射破近期頻頻失波嘅機員大門應該唔難。




另邊廂嘅機員表現亦不敢恭維，近4戰不勝兼失8球，最慘係一作客就腳仔軟，開季5次作客不勝，錄得3負2和劣績。加上奧洛基、祖舒威廉斯同辛迪亞高派姆3名中後防主力打柴，攻擊中場羅比羅渣士又被美國隊徵召肯定倦勤，作客情況更難樂觀。




再睇埋對賽往績，機員近6次作客紅牛輸足5次，球員心理肯定輸蝕，今仗輸埋人腳睇怕都冇運行啦！