馬主論戰

猪拉多纳

潘頓要食雪米糍

　　季尾開始人疲馬乏，實力馬搏多咗都可能會攰，揀馬都係宜冷忌熱，今次一於吼實兩匹半冷馬。推介第四場「雪米糍」，之前已經一再試準走勢，上場改配潘頓居然跑包尾，今次原庄人馬再上陣，睇嚟唔會再失威。另外鍾意第五場「軍花」，今季跑四場獲三季一殿，演出其實好準，王志偉實力坐騎向來唔多，既然有實力馬響手，應該都會好好把握機會贏番場。

張敬山

喜威寶重返勝途

　　何澤堯上周三憑「心路」同「聚有盈」起孖，手風真係好順，雖然今日只得五匹坐騎，但都唔可以睇小。推介第四場「清風駒」，近三場跑唔同路程全部上名，四歲馬愈跑愈進步，今次再跑1400米可出頭。另外鍾意第六場「喜威寶」，始終都係跑泥地威力最強，上場跑草地輸咗，唔使太過介懷，今次跑番贏馬路程泥地一哩，應該會有唔同演出，值得吼實。

任達華

太陽奇妙咪睇小

　　姚本輝今日手馬幾惡，我睇好佢有馬贏。推介第五場「太陽奇妙」，唔經唔覺今季已贏咗三場頭馬，上場跑田草2200米輸咗，賽後被驗出氣管有血，敗績唔可以作準，今次捲土重來有權贏番一場。

　　另外推介尾場「中環英雄」，上場轉姚廐初出，即刻擊敗「如願以償」贏馬，後駒再出再贏，賽事水準如何唔使多講，今次再跑1400米，一於捧場。

寇鴻萍、梁廷鏘