賠率有路捉：金得意P飛離奇

猪拉多纳

　　筆者噚日晏晝睇飛不禁譁然，十場賽事，竟然有五場大熱門一度落喺蔡廐馬身上，當中第七場「首飾達寶」及第九場「好利利」更熱到熟晒，個W曾經連1.5倍都冇。氣勢咁勁，唔通蔡神仙真係一日五W？拭目以待。

　　頭場五班馬跑1200米，不得不提吓「金得意」，事關此駒噚日三點左右有陣離奇P飛，得1.5倍，成為位置彩池嘅大熱門，而W卻冷到30倍。睇番佢來港之後五場賽事嘅最後賠率，四次喺90倍以上，上場都仲係99倍大冷門，今次突然有P飛，唔通同佢落班有關？但佢負129磅排十四檔喎，得唔得㗎？

　　唔講真係唔知，雖然佢上仗得個第八，但幕後好似試到隻馬靠後追先掂，睇番賽事，佢其實都衝贏其後入三甲嘅「心中有勁」同「盈驥」㗎，既然練者摸到隻馬條路又有飛，投XQT時拖一票亦無妨。

韋達騎師王熨手

　　一睇騎師王賠率，都知道今日係韋達的表演日，開飛時，佢只得1.25倍，望番佢嘅戰馬，真係冇辦法唔揀佢，佢今日騎九場，竟然有六隻馬隔晚曾成為大熱門，上文提起嗰五匹蔡廐馬，隻隻都關佢事，如果佢又好似上周三咁掃興，相信會爆到風雲色變，當然，如果信正路嘅，都係買番韋達啦。

周仲