美國墨西哥最強掘金組合

猪拉多纳

05/06/2011


兩年一度嘅中北美洲最高榮譽，美洲金盃將於香港時間6月6日早上舉行，呢項賽事一向係美國同墨西哥嘅天下，近10屆有9屆由兩支球隊奪標，只有加拿大於千禧年曾經偷雞成功，堪稱最強掘「金」組合，大家無論係玩「冠軍」、小組首名抑或單W，記得都要預佢哋一份！


重召當路雲爭盃


自91年起，美洲金盃就變成美國同墨西哥嘅捧盃舞台，其他球隊入到決賽已經算叻，近10屆美國4次攞冠軍、墨西哥就5次捧盃，而自91年開始，美國連續10屆拎到分組賽首名資格，未曾甩過拖，至於墨西哥就有8次首名出線，只得91年、07年稍為失威以次名身份過關。




睇番往績，今屆美洲金盃之爭相信離唔開美國同墨西哥，其他球隊睇怕只可以爭季軍，如果有心水嘅話，最好趁早落注。根據足智彩開出嘅賠率，美國有2.1倍、而墨西哥則有2.25倍，穩陣得嚟算吸引，如果有心水嘅話，不妨早啲投X。




美國今年繼續以東道主身份出戰，自然唔衰得，因此召入王牌前鋒當路雲擔大旗，上屆佢冇份踢，搞到美國喺決賽以0比5慘負墨西哥，呢次佢有份入選，肯定唔想令球迷失望，領隊巴特利都話對現時陣容非常有信心：「我哋依然有好多好球員在陣，我認為唔會差過參加南非世盃大軍。」


衞冕靠晒小豌豆


至於衞冕冠軍嘅墨西哥，除咗前鋒卡路士韋拿冇入選，基本上已召晒所有主力歸隊，綽號「小豌豆」嘅曼聯新星查維亞靴南迪斯將會負責攻破對手防線，教頭迪拿托利仲話，有信心連續兩屆奪得錦標：「我哋有充分準備，球員全部都有各自嘅特點，雖然近年各隊實力拉近咗，但我哋仍然有能力擊敗任何對手。」