洪都拉斯保主帥勢劏魚腩

猪拉多纳

06/06/2011
文： 朱楓

聽朝美洲金盃上演B組賽事，其中洪都拉斯會鬥危地馬拉，呢項賽事係洪都拉斯領隊路爾斯蘇亞雷斯上任後首項大賽，為振聲威當然唔衰得，適逢首仗遇着魚腩危地馬拉，朱楓相信洪都拉斯有力贏波反彈，順利開出1.5倍熱W！（開賽時間：周二早上11:00）




洪都拉斯近年進步神速，上年歷史性第2度殺入世界盃決賽周，之後改由卡斯迪路執教，仲喺今年1月捧走中美洲盃錦標。可惜之後改由路爾斯蘇亞雷斯掌帥後，戰績卻突然下滑，喺熱身賽先後大敗畀南韓同中國，日前亦僅和薩爾瓦多。


危地馬拉實力參差


不過朱楓相信洪都拉斯聽朝將會反彈，事關美洲金盃係蘇亞雷斯上任後首個大賽，為面子為前途可謂再冇輸波餘地。事實上，中北美洲當地傳媒賽前都認定洪都拉斯係今屆金盃爭標第三勢力。雖然大軍缺少射手蘇亞素，但仲有中場柏拉西奧斯、亨特利湯馬士同後防美羅費古羅亞3件効力英超球星孭飛，認真上嚟絕對唔係人咁品。




對家危地馬拉一向係中北美洲弱旅，歷嚟喺金盃累積只得3勝6和14負，今屆喺美洲金盃外圍賽，幾經辛苦先反勝魚腩尼古拉瓜打入決賽周。雖然危地馬拉大軍有今季喺美職狀態大勇嘅前鋒卡路士雷斯同中場馬高柏巴在陣，弊在其他隊友實力參差，今鋪對住矢志反彈嘅洪都拉斯，實在唔似有運行。