福士老查帥月風雲

魑魅魍魉

07/06/2011
文： 巨高

人老精、鬼老靈，兩位著名領隊德國人福士及意大利人查帕東尼曾經叱咤一時，同樣試過率領所屬國家出戰世界盃等大賽，被譽為金牌教頭。可惜歲月催人，兩位名帥被嫌老，為祖國球壇所不容，惟有轉戰他鄉，但佢哋心中團火從未熄滅，繼續打拚。今晚福士及查帕東尼分別帶領阿塞拜疆及愛爾蘭倒戈祖國，要證明自己老有所為。


意軍試陣讓唔起愛爾蘭


國際熱身賽，愛爾蘭及意大利將於中立場比利時「拍跳」。愛爾蘭近期態勇，近三場連勝兼不失球。雖然意大利亦錄得多場不敗紀錄，但領隊柏蘭迪利有意在今場試陣，大量副選球員將會列入先發陣容當中。意大利爭勝意欲偏低難讓對手，愛爾蘭「讓球主勝」值得捧場。（周三凌晨2時45分開賽）




意大利剛於歐國盃外圍賽輕取愛沙尼亞三蛋，基奧斯比羅斯、卡斯辛奴及派路都備受讚賞。不過領隊柏蘭迪利希望借今場去試陣，上述三名球員可能連後備都冇。後防方面會起用卡辛尼、甘巴連尼、基斯薛圖等二線球員，前場就改用基奧雲高、柏仙尼及馬特尼。相比起對愛沙尼亞時嘅陣容，人腳級數明顯減弱，要贏愛爾蘭有一定難度。


近兩次對賽和氣收場


愛爾蘭於○八年聘請意籍名帥查帕東尼後，球隊演出的確好轉，而最近兩次對住意大利都能夠打成平手，證明愛爾蘭喺「戰術大師」指揮底下，根本唔驚意大利。賽前查帕東尼及助教達杜尼都話冇面畀，對住老家一樣會砌盡求勝。其實查帕東尼近兩次對住意大利都顯得特別緊張，主要原因係面子問題。