巴西大騷歡送朗拿度

魑魅魍魉

07/06/2011
文： Mic少

今午至明早有多場國際熱身賽，最值得留意係巴西主場對羅馬尼亞，今場係朗拿度告別賽，「大哨」屆時將會粉墨登場，相信兩隊都有默契會畀呢位一代超級射手入番粒，為球員生涯畫上完美句號。投X呢種充滿表演性質嘅賽事，梗係要1.5倍入球大。（周三早上8時50分開賽）




朗拿度二月宣布掛靴後，希望可以踢一場告別戰，巴西足總就安排今場對羅馬尼亞，為佢搞Farewell。現已肥腫難分嘅朗拿度難以應付全場比賽，將安排佢踢上半場最後十五分鐘，然後喺中場休息時，接受巴西足總頒獎及球迷歡送。


羅馬尼亞配合娛賓


不過「大哨」身為世界盃決賽周史上入球最多球員，冇理由以食白果告終，兩隊應會識做踢一陣「默契波」，畀朗拿度入一球，完美告別。




撇除「默契波」因素，巴西亦需要強攻，爭取漂亮勝仗，因為佢哋日前同荷蘭踢熱身賽，僅打和○比○，令球迷及傳媒非常不滿，今場必須作出交代。




羅馬尼亞上仗歐國盃外圍賽大勝波斯尼亞三比○，効力史特加嘅馬利卡梅開二度，狀態當勇。客軍著名射手梅度不在陣，其他前鋒正好把握機會爭上位，進攻方面隨時有更佳發揮，要破蛋應該唔成問題。