棟悉先機：駕世仔縮程搏殺

港陌

　　連同今期谷草夜賽，今個馬季剩番9期，各位馬友真係要好好珍惜機會，不過，恕阿棟長氣講一句，玩馬要量力而為！今期谷草A欄賽事，冇話邊一便騎練特別惡，不論前列馬房或騎師，都係咁話，所以，要小心度馬，唔好一窩蜂捧大馬房及大騎師。

　　第三場三班1650米。「千江映月」純粹睇谷草1650米往績，點都唔會惹起大家目光，跑4場得1個P咁多，難聽啲講，叻得去邊噃！要知道，4場之中，有兩場賽後驗到氣管有血。

千江映月上名水準高

　　而上名一役只係輸半個身位畀「驚喜」，當時後駒係弗到震，殺上二班仍跑P，所以，「千江映月」入圍水準幾勁。今仗轉場演出如何？可否承接近績咁穩定，真係兩睇，但今季未交代，一定把握機會。

　　第六場三班1000米。「活力至寶」上場大敗可以有好多唔同解釋，我就唔會去鑽牛角尖，班次唔同，隻馬高攀不來就算。今仗回到三班，去邊度搵上場嘅對手「加州財子」，阻力自然冇晒。其實，以佢季內三班成績，唔係頂尖分子，都肯定係中堅，如果唔係點會差唔多場場入前列。而縮程上陣形勢唔係咁明朗，不過早段如夠快，以佢後勁，有權追到上嚟。

　　第八場三班1800米。「駕世仔」近仗成績唔係好，3場賽事之中，冇1場可以上到名，係評分有壓力？嚟到季尾冇體力？有提早唞暑心態？我就唔多清楚，但見上場跑大長途，跟到返嚟而仲輸得唔遠，演出有啲令人感意外。呢場縮程而轉用小將，有啲博人唔信之感！

點買法

　　由於「千江映月」今季未有頭馬入袋，應該好有鬥志，博W揀佢，但就唔建議玩過關。講到Q，抱有博冷心態，尾場一於搵邊線馬「駕世仔」做膽，射幾匹有分頭之馬，補埋PQ亦有數圍！

陳華棟