高清睇跑馬：進攻足球對手弱

港陌

　　「浪漫添馬」加盟苗廐後如有神助，上季三戰已得一冠兩亞，今季首戰更一出即勝，之後九仗再多添一冠兩亞三季，其中上仗於總場次590的谷草1650米蝕得誇張，排九檔起步後，入彎冇耐已移出三叠，去到彎尾再拉出八、九叠，亦係於最外叠轉彎之馬，如此劣勢仍追回一席第三，輸給頭馬「魅力星」個多馬位，證明評分仍有優勢。今戰吼準首本戲而來，小休後體力充沛，加上韋達一早過檔及親自彈閘，如此積極必拼無疑。

　　「進攻足球」大前仗初跑谷草1650米即落飛搏殺，可惜冇段好睇跑第十，接戰轉爭田草1600米，閘前又有飛落，結果飛到馬到首次入Q，僅不敵佔盡先機的「勁加勁」。上仗於總場次658捧成熱門好正路，卻輸畀「高分貝」兩個馬位跑第二。不過，「進攻足球」前仗入位時跟得好前，上仗卻留到極後，尤其入直路時，鞍上人蔡明紹未有將坐騎拉出外檔，反而繼續在內檔衝，故此塞足大半條直路，直到拉士百五米「進攻足球」先望空，如非走位老襯，相信必可跑得更近；今次改攻谷戰擺明貪對手弱，重配馬偉昌係時候補中。

Sam