肯薩斯主場揭幕開加年華

猪拉多纳

09/06/2011
文： 亨格比利

等到頸都長，肯薩斯體育會終於連續捱晒10場作客波，聽朝佢哋會喺新建成嘅利夫士莊體育公園球場首度出擊，咁值得紀念嘅時刻，試問班球員又點會掃Fans興吖？對住沉到爆嘅芝加哥火燄，相信3分手到拿來，捧1.95倍主勝。（開賽時間：周五早上10:00）


芝加哥火燄傷兵多頹爆


連續10場波作客，單係舟車勞頓都夠慘，肯薩斯體育會家陣包艇真係情有可原。不過，佢哋個利夫士莊體育公園球場聽朝正式開幕，呢個斥資2億美元，被譽為全北美最先進嘅球場，設有196個WiFi路由器畀球迷免費上網，場內螢幕又全部都係高清，加上今戰嘅波飛已經晨早售罄，肯薩斯體育會獲大批球迷支持，實會打番場好波。




雖然話主隊有中場奧維利、羅渣艾斯賓路沙同洛卡素等4位國腳因出戰金盃缺陣，但火燄亦都有一大籮傷兵，計落就有中堅米古歷、中場馬高馬歷同班拿等主將，加上火燄已經連續10場聯賽失分，頹成咁想全身而退都幾難！