洪禮賢講馬：轉跑泥地延續美麗

港陌

　　第九場三班1200米泥地。「延續美麗」唔跑周末班內直路賽，走過「泥」一試，唔想又同廐侶「勁闖駒」一齊跑，可以理解，因為上次已經同場，完全唔夠爭，事前計賽績、計時間，唔會係跑到P都冇嗰隻，偏偏之前造55.77秒嘅能力，跑落交唔番出嚟，重磅？倦了？評分漸緊手？狀態回落？其實幾難去定，不過，轉場地則又有唔同計法。

　　今仗初跑泥地，究竟係因為避撼廐侶才行呢一步，定係特登轉場，可能後者吧，事關6月尾仲有1場班內直路賽可報，有冇需要跑呢場？未必囉！而轉場嘅適應力，未必可從之前試泥閘反映到晒，不過，佢係有幾樣嘢去支持喺「泥」得，天生速度高、重秤、血統背景、排檔等等，如果落場應付到，隨時似廐侶「一定爆」，轉泥照贏。

　　第十場二班1400米草地。幾匹有前景、有往績、有路程根據之馬齊齊喺呢場，揀邊匹做膽係有啲頭痛，結果選了「喜惑」。3歲仔上場贏到，真係幾有難度，匆出、加程、132磅，計埋前中段沿路二叠望空擺前（頭兩段略比標準時間快），以唔算牽強姿態勝出，加7分係賺咗。今仗升二班跑，因用小將，磅位再輕啲，主要兩匹對手「超群如意」和「一定爆」，分別讓12及8磅，計落未必讓得起，再勝一場應冇問題。