高清睇跑馬：追勁凌厲可再「勝」

港陌

　　第五場「龍勝」上仗總場次639落飛搏殺，結果飛到馬到順利取勝，證明之前小休兩個月效果理想。睇番整個作戰過程，排五檔起步其實唔算太差，但唔知係幕後特別指示，定係都爾覺得此駒唔鍾意混在馬群，全程無意走入內檔，之後更被頂出四叠，既要蝕位又要望空，轉彎時此駒又自動波上前，耗了不少力氣，導致直路初加速唔勁，幸好拉士一百米回到氣撻得着，結果以凌厲後勁贏馬，走勢譽滿欄邊。

回配潘頓戰意鮮明

　　贏馬後此駒加分不多，寶尾追得過，再者騎練戰意鮮明，有1400米勝途唔報，決定回配潘頓殺上1600米，此子為了證明唔輸蝕畀都爾，必施展渾身解數，相信可再W。

　　第六場「寶德」自購馬來港密密跑，三月中出戰總場次462田草1400米首次上名，該役水準唔高，吸引處只在於所負距離不遠，之後兩仗轉跑田草及谷草一哩皆冇影，告仔痛定思痛，近兩仗終於報番最佳路程田草1400米。

　　此駒近兩仗同樣排十四檔起步，形勢極之不利，尤其前仗總場次611，該役前領馬不少，故此早段牠未能進佔前列，放又唔係留又唔係，極之尷尬，最後搞到沿途走三、四叠冇遮檔，難得蝕位極多一樣力保季軍；至於上仗則快馬唔多，可以搶欄快放，惜早段推騎用力，末段衝刺唔算勁，加上遇着後追好手「快達小子」及「明旺」，唔夠衝之下先得第三。東廐馬一向好開例好，何況此匹未出頭馬必急於要有所交代，今場信心之選。

Sam