賠率有路捉：健康藍莓隔晚重飛

魑魅魍魉

　　噚日睇飛，又出現剛周三谷草夜賽前嘅情況，頭四場及尾兩場曾成為大熱門嘅馬照舊W熱P冷，例如頭場「好利佳」，W得2.2倍，P竟然可以有2.5倍；第二場「黃金年代」隔晚W得1.7倍時，P又有1.6倍。或者你會話，佢哋係處女馬，冇信心好正常，但第十場「超群如意」冇得講啦，隔晚4.8倍W成大熱門嘅同時，P可以賣到2.8，所以大家都係小心為上，戰果隨時又暴冷暴熱。

　　第四場四班1800米泥地，「健康藍莓」獨贏明顯有飛，一點鐘個W6.4倍，相對佢上仗嘅41倍，係有料到。相信呢啲飛未必因為佢出戰四班而落嘅，事關佢前仗其實都係落四班作賽，但開售時一樣凍冰冰，成18倍。既然唔係呢個原因，咁究竟點解呢？

　　唔講唔知，原來佢每逢出戰泥地1800米，有班高人都會押注落去，故此歷來三跑此程，最後賠率未試過超出10倍，最神奇係，除咗上季初戰此程嗰次，佢都真係交足貨，跑得一冠一殿，今次高手們又郁手，不妨跟吓。

潘頓吳嘉晉齊擔大旗

　　韋達停賽，騎師王賠率冇想像中咁亂，有兩位騎師3倍，分別係潘頓同吳嘉晉。前者始終係師傅級人馬，加上又有「新希望」易攞分，可信啲，一於捧佢。　

周仲