U21歐國盃B組

魑魅魍魉

11/06/2011


參戰球隊：英格蘭U21、烏克蘭U21、西班牙U21、捷克U21




簡評：西班牙被視為奪標頂頭大熱，當然與其大國腳表現有關，雖然英格蘭亦係正路實力分子，但烏克蘭亦曾經响附加賽擊敗勁旅荷蘭，絕對有力做攔路虎。


打少一件．英格蘭


領隊：皮雅斯




主將：史杜列治（保頓）、韋碧克（新特蘭）




參賽次數/上屆成績：第11次/亞軍




最佳成績：冠軍（82、84）

簡評：原本陣容強勁，前鋒安祖卡路爾同後衞米卡李察士都話有傷避戰，阿仙奴中場韋舒亞更主動要求免役。臨尾仲有左閘基蘭基比斯退隊，領隊皮雅斯仲放棄補選，今屆只得22人大軍出戰，惟有寄望剛以高價加盟利物浦嘅中場佐敦軒達臣等主將踢出水準。

華麗熱門．西班牙

領隊：路爾斯米拿

主將：迪基亞（馬德里體育會）、 桑馬達（華倫西亞）

參賽次數/上屆成績：第11次/分組賽

最佳成績：冠軍（86、98）

簡評：承接西班牙奪得世盃冠軍氣勢，今屆U21歐國盃絕對係華麗出擊，巴塞隆拿前鋒保贊、西維爾翼鋒迪亞高卡普（圖）、畢爾包中場查維馬天尼斯同馬德里體育會門將迪基亞全部入選，今屆西班牙U21喺外圍賽有6勝1和1負，只係輸過畀荷蘭U21，唔攞冠軍球迷肯定唔收貨。

不敗雄師．捷克

領隊：杜華利尼

主將：柏赫特（紐倫堡）、高薩克（拉素）

參賽次數/上屆成績：第5次/外圍賽出局

最佳成績：冠軍（02）

簡評：由外圍賽至附加賽共10場未逢敗績，屬今屆唯一不敗之師。領隊杜華利尼今次點兵徵召多名大國腳入伍，其中新季將會轉投紐倫堡嘅高大前鋒柏赫特，外圍賽共入9球。拉素企穩正選嘅全能中場高薩克，亦會係爭勝重要棋子。捷克喺00同02年連續2屆分奪亞軍同冠軍，有望再取佳績。

土炮話事．烏克蘭

領隊：伊高雲高

主將：耶莫蘭高（基輔戴拿模）、 卡維斯（基輔戴拿模）

參賽次數/上屆成績：第2次/外圍賽出局

最佳成績：亞軍（06）

簡評：以全土炮軍團出師，過往雖僅曾一次殺入決賽周，即能勇奪亞軍。外圍賽能壓倒法國出線。領隊伊高雲高得到大國腳領隊布洛堅全力支持，徵召7名大國腳隨軍出征，話明以奪冠為目標。前鋒耶莫蘭高及卡維斯都係基輔主力。