法林明高夫添增勝算

猪拉多纳

12/06/2011
文： Combo King

今個夏天屬於美洲波嘅世界，美洲金盃依家進行得如火如荼，下月仲有美洲國家盃。阿King今次向巴甲埋手，重心推介帕拉尼恩斯主場對法林明高，平手盤要法軍。帕拉尼恩斯近況差到痹，連續三場捧蛋，有地利亦無補於事，法林明高喺朗拿甸奴率領下，可趁機重敲勝鼓。（周一清晨5時30分開賽）


莊家睇淡帕拉尼恩斯


帕拉尼恩斯可以話係今季巴甲表現最差球隊，開季後聯賽三戰全敗兼冇波入，球隊似乎陷入信心危機，相信短期之內難以翻身。值得留意，帕軍近六次主場對法林明高，取得五勝一和，佔有壓倒性優勢，但今仗莊家只係開平手盤，明顯睇淡帕拉尼恩斯。




法林明高雖然近兩仗都和波，但上仗對手係強隊哥連泰斯，失分情有可原，球星朗拿甸奴表現對辦，佢喺今季三場聯賽已有兩球進帳。另外，早前跟隨巴西國家隊備戰美洲國家盃嘅中場主將堤亞高尼夫斯，最終落選大軍名單，佢已返回法軍，令球隊陣容更完整，增添勝算。




哥列迪巴大起保地花高




另一場戈亞尼恩斯主場對施亞拉，主隊水準跌Watt，遭逢兩連敗，讓唔起施亞拉，捧「讓球客勝」。保地花高主場對哥列迪巴，兩軍攻力佳，哥列迪巴近兩仗更共入八球，要入球大。