叱吒楓雲：英幼獅超班 再噬鬥牛軍

猪拉多纳

12/06/2011
文： 朱楓

今屆U21歐國盃B組堪稱死亡之組，事關同組除英格蘭、西班牙同捷克3支前度冠軍外，仲有06年亞軍烏克蘭，當中「幼獅兵團」可謂4隊中近年表現最穩定嘅勁旅，07年殺入4強，上屆殺入決賽，係今屆賽事唯一一支連續3屆打入決賽周嘅球隊，難怪目前高踞歐洲足協U21排名首位。


雙星搞掂轉會專心搏殺


雖然「幼獅大軍」缺少韋舒亞同安祖卡路爾兩名球星，賽前再有米卡李察士同基蘭基比斯因傷退隊，不過基蘭基比斯離開後卻未有補選球員，足證領隊皮雅斯對目前陣容極之有信心。事實上，英格蘭好多新星今季都有出色表現，其中佐敦軒達臣同菲爾鍾斯，近日分別落實轉投利物浦，以及有機會加盟曼聯，雖然兩人因為咁而遲歸隊，但皮雅斯話佢兩個喺大賽前搞掂轉會，反而可更加專心踢U21賽事，有助「幼獅軍」爭勝。


西班牙3戰不勝狀態曳


係，對家西班牙近年新星湧現，今屆仲有桑馬達同查維馬天尼斯兩位世盃功臣「降呢」壓陣，但有名氣唔代表一定好，何況「迷你鬥牛軍」近況麻麻，日前主場被白俄羅斯U21逼和1:1後已3場不勝，賽前更傳出前鋒蒙尼恩同中場堤亞高艾簡達拿可能因傷缺陣，殘陣出擊已經唔掂，再睇埋佢哋史上8次對住「幼獅兵團」只得2勝1和5負，包括09年一屆分組賽輸0:2，睇落今晚想報仇唔係咁易！


小鬥牛軍對賽輸蝕


‧近8場5勝2和1負，對上3場不勝兼失5球。




‧近8次交手，只得2勝1和5負，明顯輸蝕。


幼獅分組賽有料到


‧近8場4勝1和3負，半場只試過1次落後。

‧近兩屆賽事分組賽未嘗一敗，總計3勝3和。

U21歐國盃賽制

8支參賽球隊分為2組，每組4隊踢單循環，頭2名進身4強淘汰賽。若同分的話，將順序以下列方法定排名：1.對賽成績2.總球差3.總入球數4.抽籤