洪禮賢講馬：馬少場合熱門英雄塚 季尾自求多福

猪拉多纳

　　巧合嘅定義，可以係人為，也可以係自然發生，但兩者嘅意義有深層次嘅唔同。如果1場球賽，守龍門嗰個，賽前嗰晚走咗去劈酒，落場實會冇厘神氣，比賽時甚麼「牛油手」等蝦碌鏡頭，點會唔係一幕幕咁出現，佢隊球隊想贏波……算吧啦！

　　如果1場球賽，嗰個龍門，賽事期間，因忽然頭暈身㷫，在禁區內觸覺唔夠，自然會製造好多機會畀敵方，結果可能係畀人數完1粒又1粒，被狂數輸波離場。

　　上述兩個例子，兩隊波同樣係輸，巧合地，亦係衰喺個龍門，不過，誘因略不同，因為1個係明知故犯，另1個係情有可原。如果純粹睇表面，或者認為個龍門責無旁貸之嘛！

　　賽馬其實亦有好多巧合，時近季尾，有部分場合真係「翹」到冇朋友！如果有留意呢個幾兩月嘅賽事，經常馬少場合就會爆到七彩（新馬賽當然唔計啦！）而更巧合係嗰啲場合，梗有「啡啡綠綠」嘅燈喺電算機閃吓閃吓，好多時仲要中得好應，唔啡唔綠嗰瓣就唔跑出嚟。太遠嘅唔講，25/4「神州八號」贏馬一役係咁，日前「傳奇快車」嗰場嘅情節大致相同。唔通嚟到尾聲，馬少場合真係熱門實力馬嘅英雄塚？！如果係真，有玩呢類場合嘅馬友，到時唯有自求多福。