高清睇跑馬：浪漫添馬有分在手

港陌

　　「超晒班」自去年10月中在谷草1000米上名後，每次出賽都備受熱捧，但多場均只得個近字，未能順利開齋；前仗更於谷草1200米包尾而回，賽後被驗出氣管有血。幸好經姚本輝悉心訓練下，「超晒班」的健康已回復正常，上仗於總場次649出爭谷草1200米，更被捧成2.2倍大熱，足證台前幕後信心十足。

超晒班實力雄厚

　　該役「超晒班」排一檔起步，原本形勢大好，但過了一千米處後，黎海榮的馬鞍向前滑移，令他在餘下途程上陷入不利的處境。之後黎海榮索性鬆韁讓馬兒順走，入直路時走出中外叠蝕位不少，但最終一樣贏馬而歸，盡顯超班實力。今戰「超晒班」仍留在四班上陣，不會有任何阻力，只要陣上發揮正常，連捷可期。

　　「浪漫添馬」對上三戰兩上名，其中以總場次590出爭谷草一哩的表現最出色，該役牠排九檔起步，出閘後守在中後位置，全程埋不到欄。入直路時更兜出大外叠蝕位，但依然能夠交出強勁衝刺，最終走入一席季軍，僅以個多馬位落後頭馬「魅力星」，反映現時仍有分在手。

　　上仗「浪漫添馬」改由韋達操刀，原以為會有更佳發揮，豈料排六檔仍全程被頂出外叠，最弊馬已上口，不能留前鬥後，被迫繼續走三叠望空，而韋達亦冇執生中段踩油，依舊走外叠蝕位，如此發揮之下，自然難有好演出，最終跑第十而回。今次「浪漫添馬」隔一周匆匆再出，似乎幕後亦心有不甘，改配馬房愛將卓利上陣，一於追多次。

Sam