棟悉先機：事事順意級數高

魑魅魍魉

　　近日天氣持續唔穩定，有時一落開雨，雨勢真係唔細，所以，今晚跑馬，要睇天行事，除了影響度馬時嘅取捨，亦都會影響埋投X意慾。大家都知啦，阿棟唔太喜歡偏差大嘅賽道，我份人唔鍾意勉強，「焗賭」無乜謂，就算唔自動「停賽」，注碼方面點都會比正常少一大截。

　　第三場四班1200米。「事事順意」近兩場跑得幾差，要搵敗因唔容易，前仗都仲好啲，初跑泥地，一句唔啱，可以抹咗去，上場1400米真係𢱑晒頭，全程跟好位冇錯，直路卻唔識變速，唔通甩咗蹄鐵影響咁大，我都唔敢肯定？！今仗縮程至谷草1200米，方仔又畀難題大家諗諗，好彩儲了個幾月，有新鮮感， 此程唔擔心， 只係怕谷草性能， 如果隻馬OK，以佢贏田草級數，在今場有得爆。

　　第六場三班1200米。「沙紙」畀人取消頭馬資格一役，係贏「喜惑」，後駒目前已在二班跑緊，前駒仲係70分，我唔會覺得冇着落直至季尾，除非手法使然。而上場初跑谷草即入Q，全程跟得到又追得好，注定將來可能集中在谷草搵食。至於今場有1檔之利，已是B欄不可或缺嘅有利條件，如加眼罩有幫助，可望勝回一仗。

勁勇士腳唔痛好惡

　　第七場一班1000米。如果「勁勇士」唔係腳痛的話，以佢在谷草1000米嘅往績表現，就算在一班角逐，其實唔係完全下風，尤其只係負112磅。再者，腳患嘅嘢，有晒紀錄公布，你知我知大家知，但點解隔晚仲係咁多飛，曾經得6倍幾獨贏，所以，如臨場持續票勁，就要小心呢匹路程專家。

點買法

　　老實講， 今期唔係好想推介3 場，因最喜歡係得「沙紙」的1場，如果問阿棟點擬定策略， 單W 一注， 補P 冇意思。由於那場亦係會熱門居多， 感覺上，第六場較為啱玩。

資深評馬人　陳華棟