幼獅大難不死搶開齋

魑魅魍魉

15/06/2011
文： 朱楓

大難不死，必有後福！「幼獅兵團」英格蘭U21首仗初段被西班牙撳住嚟砌，但最後反攻奏效成功逼和，鬥志認真驚人，今晚喺U21歐國盃B組對住冇咗隊長嘅烏克蘭，相信可以喺分組賽開齋，1.68倍客W要捧！（開賽時間：周四凌晨2:45）




英格蘭U21首場對住西班牙U21陷於苦戰，開波14分鐘已落後，不過喺下半場卻愈踢愈好，最終喺完場前憑前鋒韋碧克入波逼和1:1，出任右閘嘅基爾獲加更多次爆贏對手，係全場表現最突出一員。賽後韋碧克大讚隊波有耐性，中堅基斯史摩寧就讚大家有團隊精神。


菲爾鍾斯搞掂轉會專心搏殺


事實上，「幼獅兵團」目前嘅士氣真係冇得頂，近日班球員除練波外，仲成日打乒乓波做娛樂，再加上正選後防菲爾鍾斯啱啱過檔曼聯，同中堅拍檔基斯史摩寧做埋隊友，可以專心比賽，對英格蘭絕對係好事。




烏克蘭U21首場對捷克U21，本來被認為五五波，點知打到中段已落後0:2，直至臨完場前先破蛋，最後輸1:2不得止，隊長史堤巴蘭高更喺比賽中傷出，賽後證實緣盡分組賽，冇咗呢位効力薩克達嘅大將，打擊都咪話唔細，今場對住平均質素較高嘅英格蘭，輸少當贏啦！