特林素踢到曉飛繼續W

猪拉多纳

16/06/2011
文： 走肖

正所謂順開有條路，特林素今晚喺挪超主場對利尼史特朗，主勝值得再追，原因唔止係佢哋今季踢到曉飛，連盃賽開季踢12場有8勝4和，而且佢哋嘅38歲隊長魯殊費特，國際賽期前連中三元，職業生涯累積168球成為挪超史上最多產射手，信心爆棚有望添食。（開賽時間：周五凌晨1:00）


利尼史特朗傷兵多表現曳


上季得季軍嘅特林素，今季氣勢更加勁，當中老牌射手魯殊費特依然係佢哋嘅支柱，佢喺國際賽期前主場對白蘭恩嘅賽事，大演帽子戲法帶挈球隊以4:1勝出，今季累積6球進帳，職業生涯累積168球成為挪超No.1射手，對上3季特林素主場對利尼史特朗得2和1負，呢場係時候發惡威番次。




對家方面，利尼史特朗受到傷兵問題困擾，近期表現好一般，而且長期傷兵包括前鋒艾斯約達維、中場艾寧古迪遜、馬迪亞斯波里同施哥亞仲未可以復出，今季攻入3球嘅冰島前鋒施古達臣，又去咗踢U21歐國盃，唔好忘記，近5場利尼史特朗有3場冇波入，咁嘅情況輸波係意料中事。