墨西哥掃平危地馬拉

魑魅魍魉

18/06/2011
文： 朱楓

聽朝美洲金盃爆發8強激戰，爭標大熱墨西哥將硬撼危地馬拉。「仙人掌」墨西哥狀態大勇，賽前仲獲准補選5位球員，救兵就快到，依家個個肯定心雄，相信可輕鬆摧毀危地馬拉條鹵莽防線，讓2球照可捧1.9倍「讓球主勝」！（now634台及廣東體育周日早上8:00直播）




爭標大熱嘅墨西哥，踢落極之對辦，首場就大炒薩爾瓦多5:0，之後雖有守將奧蘇里奧退隊，兼有門將奧祖亞、後衞法蘭高洛迪古斯、杜亞拿斯、中場尼爾遜同貝姆達斯被驗出曾服食瘦肉精即時被罰停賽，但剩番17人下仍喺餘下兩仗照炒古巴同哥斯達黎加，3仗加埋勁入14球僅失1球，平均每場入4.6球，睇落人少咗影響唔大。


小豌豆排射手榜No.1


鬼咩！墨西哥今次大軍人腳超勁，當中曼聯射手查維亞靴南迪斯輕輕鬆鬆就入咗5球排射手榜「冧巴溫」，足證「小豌豆」喺金盃真係超晒班，加埋左翼古亞達度同杜斯山度士近況都弗到漏，試問今屆金盃有邊隊擋得住？賽前「仙人掌」仲收到好消息，之前食禁藥嘅5位球員因成功通過第2次藥檢，國際足協宣布批准墨西哥補選5位球員頂替，就算今場趕唔切落場，都足夠提升士氣啦！


茅柴防線益晒「仙人掌」


危地馬拉喺分組賽表現一般，頭兩場都失分，直至最後一場大勝魚腩格林納達，先以最佳第3名出線，今場對住大勇嘅墨西哥，想再創奇迹唔係咁易。畢竟危地馬拉條防線水準勁曳，分組賽時已先後有亨利麥甸拿、卡比拉同洛利加領紅，今場怕且又要用超技術，隨時又要以寡敵眾，加上中場卡路士費古路亞因傷已緣盡賽事，聽朝真係隨時被人炒鑊甘都唔奇！


賽制


美洲金盃8強採一場決勝制，法定時間賽和須加時作賽，再和則互射12碼定勝負。