美國士氣曳好牙煙

猪拉多纳

19/06/2011
文： 朱楓

美國喺今屆金盃表現真係令朱楓好失望，點知最近仲連環爆出負面新聞，相反牙買加嘅「性感足球」愈踢愈有信心，加上幾乎有大半隊喺美職比賽，大收知己知彼之效，今晚呢場8強大戰，朱楓睇好牙買加至少可以喺法定時間保持不敗，開出2.5倍「讓球客勝」！（now634台及廣東體育周一凌晨3:00直播）




牙買加喺今屆金盃令人眼前一亮，喺分組賽B組3戰全勝，入7球未失1球，創出參加金盃以嚟分組賽最佳成績，全面踢法更被外間大讚為性感足球。本來牙買加近17次對住美國都未贏過，不過隨住球隊近期狀態急升，領隊韋摩亞賽前亦揚言有信心今場打破宿命威番鋪：「我哋今次參加金盃係以入4強為目標。今場對美國的確係場硬仗，但我哋已做好心理準備。」


牙買加多美職兵熟晒路


牙買加今屆表現咁好，以洛杉磯銀河門將當奴雲歷格斯為首嘅7名美職戰將功不可沒，佢哋話日日都喺電視睇美國班球員比賽，有啲甚至係隊友，摸熟晒a佢哋踢法，相信今場會有優勢。再加上以3球排射手榜第2位嘅迪馬菲臘斯等6位効力挪超球員，戰鬥力真係唔好睇小。


當路雲丹普西請假去婚禮


賽前被譽為爭標大熱嘅美國，踢落差強人意，首仗贏加拿大2:0後，次仗竟以1:2不敵巴拿馬，最後一仗對住魚腩瓜德羅普亦僅勝1:0。由於隊波表現太差，左閘保卡尼加率先發難，話希望改打中堅，但最大鑊係領隊巴特利，日前竟然批准當路雲同丹普西兩大主將暫時離隊參加屋企人嘅婚禮，唔使練波3日，仲要搵專機接佢哋返嚟，大細超到咁，試問班細嘅點會服，士氣唔好你話仲點捧得落？


牙買加8戰半場不敗


‧近8場5勝2和1負，半場未試過落後。




‧世界排名55，比美國低33位。

美國近戰旺開細

‧近8場3勝2和3負，當中6次開細。

‧近17次交手未輸過，獲9勝8和。

賽制

美洲金盃8強採一場決勝制，法定時間賽和須加時作賽，再和則互射12碼定勝負。