幸運金龍值二班

猪拉多纳

啱啱喺英國返嚟，尋朝晨課先至蒲頭嘅苗禮德，入場即刻攞頭威，靠兩歲馬「幸運金龍」贏咗新馬賽，近四次賽事除咗禮拜三冇入場之外，老苗鋪鋪都有馬贏，旺氣逼人。
       
幸運金龍輕鬆一放而回。

今季首場嘅千四米新馬賽，只得四隻馬跑，過程自然平淡，「幸運金龍」捧到一點二倍大熱，結果無驚無險，大勝三個幾馬位，賽後老苗講番今場新馬賽出馬少，唔可以作準，不過「幸運金龍」真係不斷進步緊，絕對係一隻前景唔錯嘅馬，來季可以大放光芒，有機會殺上二班添。至於來季嘅新馬短途錦標，老苗就話既然「幸運金龍」有資格，梗係會畀機會試吓。
       
金德寶留英抖多陣

另外，問到啱啱喺皇席錦標跑第三嘅「金德寶」近況時，老苗話會畀呢隻馬女休息一段時間，下個月先至喺英國運返香港，來季就以香港短途錦標為最大目標。