高清睇跑馬：定做評分有着數

港陌

　　「回鄉精神」季初在谷草1200米打開勝門，但之後連場欠表現，只在同程多取得一次季軍。於是梁定華亦不斷諗計，替此駒轉程出擊，謀求新出路。

回鄉精神捲土重來

　　近兩仗「回鄉精神」均出戰谷草一哩，前仗採用留前鬥後跑法，結果末段以勁勢追入一席第五，僅以兩個多馬位輸給頭馬「和諧大使」。上仗總場次650，都爾走位醒目，冇如之前一仗般留到太後，更抵讚是察覺中段步速偏慢，過了六百米落山即踩油，雖然最終仍以頸位不敵頭馬「威力高」，但能壓倒之後屢有表現的「超勁精神」，反映這席亞軍絕非等閒。今戰「回鄉精神」吼準1650米捲土重來，值得追捧。

　　「定做」在港第二次上陣已於谷草1200米上名，當時僅以頭位不敵頭馬「六六精英」，當然惹來無限憧憬。不過，此駒今季首八戰全部三甲不入，評分亦由季初的74分，急速降至上仗的57分。上仗總場次684，「定做」出爭谷草1650米，排在11檔起步兼要負131磅上陣，客觀形勢頗不利，但出閘後馬偉昌仍用前置跑法，由於排在外檔起步，早段難免要蝕位，加上放頭的「錢程萬里」又放得急，頭三段時間為27.75、24.19及24.5秒，跟前的「定做」也是步速受害者。最終「定做」仍能放入一席第三，僅以個多馬位輸給頭馬「財源來」，表現已算出色。賽後「定做」居然獲減一分，現評56分着數到暈，應屆贏馬出頭時候。

Sam