高清睇跑馬：威威多星夠積極

魑魅魍魉

　　「千笑」於總場次405跑田草1200米，初戴眼罩下即得第四，表現大有進步，打後兩戰同程，一場跑第四另一場則得第五，次次有獎金。上仗於總場次628轉戰谷草，突改跑法下一放到底開齋，至誇張贏兩個多馬位，可見之前成績欠佳，只是未搵到最佳路程及跑法。勝後操而不戰全心等勝途再出，九百多磅馬仔負126磅夠煞食，加上蘇廐今季未贏夠十三W，戰意唔使懷疑，順利放出有望再建一功。

　　另外，「威威多星」早前連場失拖後，方嘉柏即分別出招，先係加綁脷帶，效果一般後再加防沙眼罩，結果大前仗於總場次439谷草1000米落飛搏殺，可惜何澤堯走位老襯，直路有內檔空位唔走，反而拉出外檔蝕位，仲要大半條直路塞車，最後僅得第五。

　　接戰「威威多星」跑番谷草1200米，或許跑開1000米關係，結果早段騎都唔走，至慘入直路後由內檔移出外檔衝刺，姍姍來遲下跑第二。上仗於總場次529跑谷草1200米，前速欠奉，但衝刺夠勁下輕勝之後贏馬補中的「歐洲動力」。拼後休息至今才再出，賽前試兩次大閘夠積極，不妨放心追捧。

Sam