美國復仇回馬槍

魑魅魍魉

22/06/2011
文： 樂比堅尼

美洲金盃明早上演兩場四強戰，雖然呢個盃賽爆出多場懷疑假波，但去到四強階段，相信幾支中北美洲勁旅唔敢再玩嘢。東道主美國今屆賽事初段表現欠佳，幸好領隊巴特利知錯能改，部分問題已修正，今仗再遇分組賽對手巴拿馬，有力報番一箭之仇，推介美國贏1:0及2:0波膽。（now 634周四早上7時直播）




美國分組賽未能首名出線，領隊巴特利畀人鬧到體無完膚，幸好佢都係肯接受意見嘅人，見勢色唔對即刻變陣，而且效果尚算理想，八強贏牙買加二比○唔算好清脆，但比起分組賽幾場嘅演出已算有好大進步。


補波膽1:0、2:0


樂比仔之前講過美國頭幾仗主要有兩個問題，首先係中堅添列姆欠穩，故巴特利將經驗豐富嘅保卡尼加移入中路，由列查積串演左閘，美國即刻兩場不失。




另外前線把握能力欠佳問題亦得到解決，既然三名前鋒阿古迪路、雲度路斯基同艾迪杜里冇個信得過，巴特利索性改踢四五一陣式，由雙箭頭改為單箭頭，解放中場嘅當路雲同丹普西，等佢哋參與更多進攻工作，事實證明呢招係work，丹普西上仗鬥牙買加即取得士哥。




事實上美國之前表現差係鬥心問題，近兩仗見佢哋上腳出腳都較之前果斷及有信心，喺自己地頭出擊，冇理由輸畀同一對手兩次。




巴拿馬分組賽爆冷擊敗美國二比一，當時表現唔係特別好，只係美國打得差。上兩仗對薩爾瓦多同加拿大都係臨完場先扳平，今場仲要有主將巴拉斯佩雷斯停賽，睇怕都好難破蛋成功，樂比仔睇好美國贏1:0、2:0波膽。