祖利奧華迪斯領巴拿馬升呢

魑魅魍魉

22/06/2011


巴拿馬分組賽曾爆冷擊敗美國，即時聲名大噪，球隊之所以進步神速，原來多得領隊祖利奧華迪斯注入西甲踢法，令球員有自信地控球在腳，「升呢」打地面足球。


前球星注入西甲踢法


祖利奧華迪斯係巴拿馬九十年代足球代表人物，呢位著名射手曾効力意大利卡利亞里、法國巴黎聖日耳門及西班牙馬拉加，更係馬拉加史上入球率最高前鋒，難怪呢支西甲球會四年前搵佢返球會當助教。




祖利奧華迪斯做咗馬拉加助教三年，跟過梅連斯及泰比亞等西班牙教練學法即時「升呢」，領悟到西甲最勁嘅小組進攻。祖利奧華迪斯上年執教巴拿馬後，即時將西甲管理模式倒模，球隊亦因此大有進步，證明祖利奧華迪斯踢波同教波都一樣有料到。