墨西哥振士氣大炒格

魑魅魍魉

22/06/2011
文： 力奇

今屆美洲金盃新聞多多嘅墨西哥，尋日終於收到好消息，係佢哋已經正式補選番5個球員填補禁藥疑雲退隊嘅成員位置，力奇唔信呢班後備兵喺球場上會有乜實際用途，但就肯定佢哋到臨會令陣營士氣大振。再加上「小豌豆」查維亞靴南迪斯腳風大順，墨西哥聽朝喺4強戰對住實力平平嘅洪都拉斯實食冇黐牙，我博1.95倍「讓球客勝」。（now634台周四早上10:00直播）




墨西哥喺今屆賽事都算黑仔，以正選門將奧祖亞同守將法蘭斯高洛迪古斯為首嘅5名球員因為誤服含瘦肉精肉類，搞到過唔到藥檢，踢完分組賽首戰就打道回府。到之後佢哋雖然喺分組賽光芒四射，3戰全捷入夠14球，又無情情傳出佢哋大捷嘅比賽有不尋常投X，話可能係假波咁話。


洪都拉斯火力曳聽炒


查實力奇就信佢哋無辜，眾所周知墨西哥同美國喺中、北美洲賽區係大超班嘅兩隊，過去10屆金盃就有9屆由佢哋瓜分冠軍，嚟踢呢個美洲金盃，佢哋又有乜需要服用禁藥，或者操控賽果去爭取大捷搵食先？何況隻禁藥仲係好易查出嘅渣嘢嚟嘅添。




講番佢哋補選嗰5人，當中守將希達雷路素、保羅阿古拿同希蘭美亞會先到埗，門將路爾斯米素爾同中場馬高法比安就有需要先嚟報到，無論如何都可以振奮軍心。睇番實力，墨西哥仲有「小豌豆」同馬基斯孭重飛，攻守都有保證，反而洪都拉斯上仗都係要靠互射12碼先淘汰哥斯達黎加，分組賽連8強戰共4場波，竟然有2場係法定時間冇波入，火力有限，擺明等炒啦！