河床弱「細」激死球迷

魑魅魍魉

22/06/2011
文： 九叔

好彩聽朝場阿甲護級附加賽首回合—貝格拉諾主場對河床，本地電視冇直播睇，否則又唔知會累死幾多球迷，事關河床仍處弱勢，連隊乙組仔都未必贏到，要玩都係玩1.46倍入球細算數。（開賽時間：周四早上8:00）




唔係講笑喎，河床真係累死咗個球迷，而唔係單單輸錢咁細件事。話說上場阿甲煞科戰，河床本來主場贏到拉魯斯就唔使踢護級附加賽咁衰相，點知班友唔生性輸咗1:2，搞到有個68歲老球迷嬲到响看台心臟病發暈低，雖然即場有人幫佢急救，但送到去醫院都一命嗚呼，今季呢隊河床真係害人不淺。


貝格拉諾贏主場氣勢


老實講，河床家陣認真弱過藥煲，季尾阿甲7場不勝，仲要衰到得4個入球，你敢話佢哋今日一定贏到阿乙「四哥」貝格拉諾咩？相信都冇人敢信。連河床嘅內部人士都承認，隊波目前最大問題係信心不足，球員係咁，個教練團亦一樣，據講佢哋呢幾日唔只閉門操練，怕啲軍情外洩，個陣容亦遲遲定唔到落嚟，除咗後防線依然由艾美達領銜冇乜大變，中前場都可能執過位，坐飽波監嘅艾蘭度費南迪斯會復出，點用艾斯維度、卡魯素、拉美拿同曉高柏禾尼就未定，情況都幾混亂吓。




相反乙組排第4嘅貝格拉諾，連續幾日都開放練習，任睇唔嬲，佢哋個俄國教頭施連斯基話自己隊波唔係名牌，輸都冇乜損失，所以班人特別放鬆，特別有信心。況且今場波嗰17,000個座位，只得3,000個畀河床球迷，主隊擁躉佔咗壓倒性優勢，噓都噓到你暈，頹爆嘅河床莫講話贏波，連入唔入到波都成問題，自然係博入球細着數。